2018-04-27| 14

人妻俾人食完懵懵下，仲喊住問：我係咪俾人呃西屌？

我係一個有另一半嘅人，另一半唔細心，唔識照顧我，放工時間只有打機同瞓覺，但心裡對我好嘅。

七年之癢嘅時候，我遇上佢。

佢係個溫柔，細心，好明白女性心理嘅人，好明顯拍過好多拖先累積到嘅經驗。平時工作交集，食過幾次lunch，後來佢約我食飯睇戲。第一次同佢約會，真係如沐春風，佢嘅每一句說話，每一個動作，都非常恰當，進退得宜，初嘗100分約會嘅滋味。

喺佢生日會上，佢吻了我。我地正式喺埋一齊，佢對我溫柔而無微不至，處處表現得非常關愛。一般約會唔打機唔覆message，有電話甚至未必聽，或者輕輕細聲覆答幾句就收線，完全唔影響氣氛。

我地喺埋一齊無幾耐，佢就要去日大阪旅行，生日正日會喺日本，認識我前訂落嘅，同家人一齊去，一行四人。臨行前佢好唔捨得，話好唔想去，想留喺香港同我一齊過生日。

佢喺某大公司做維修人員，而且自己有間工程公司，身兼兩職有時會分身乏術。裝修工程往往包括訂造傢俬，佢亦有返大陸傢俬廠嘅需要。夜機返港後，翌日上午佢趕咗返大陸跟一跟傢俬，之後下午趕返香港見我，俾手信我。上午搵佢無覆，返到香港先覆，佢話喺大陸收唔到，但係whatsapp顯示單剔。其實工作忙唔覆訊息我完全理解，唔會嬲。佢喺日本夾咗兩隻公仔俾我，一大一小，我提過我喜歡嘅sanrio人物。佢仲買咗幾枝酒返嚟，影咗相俾我睇，話逐枝同我飲。

返嚟之後，佢個whatsap status變咗同我同一句說話，但日文版本。

然後係甜如蜜嘅日子，我地去佢故鄉(?)粉嶺食豬腳麵，佢想計劃約大陸工作嘅細佬同我見面，上太平山睇夜景，去布袋澳看海食海鮮，去澳門玩到簡直唔想返香港；佢去睇工程進度，我喺樓下等佢；我生日剛巧佢有大假，佢打算帶我去泰國。

我好擔心待薄佢。我係有另一半嘅人。而佢俾我嘅係前所未有嘅溫柔。我好怕現有嘅關係會影響我同佢之間嘅發展。

有一晚，我地食完飯，佢想去飲杯嘢。我十五十六。佢生日會上嘅酒精促使我地喺埋一齊，酒可以話係我地嘅媒人，但我好多年無飲酒，其實飲唔太多就會唔舒服，而且夜喇，我真係攰，又難向另一半解釋。結果我無飲嘢就返屋企，佢自己去搵酒飲。返到屋企，滿腦佢落寞嘅神情，whatsapp佢又唔覆。於是我返屋企沖個涼再出門搵佢。原來佢同朋友飲緊，一d都唔落寞，無覆係因為有伴，我諗多咗。

飲緊嘢嘅時候，朋友訴苦，關於唔想老公先一段婚姻嘅小朋友成日出現家族場合嘅問題。佢聽咗有d緊張。佢係離過婚，有個女嘅人。因為facebook有好多女兒嘅嘢，所以佢一直唔敢加我fb。佢問我點睇。其實，你女兒就是我女兒，有家族活動接埋佢無問題，平時我地帶佢玩無問題，只要帶佢玩次數唔好多過我地約會次數就ok。

佢講過佢情史我聽。最刻骨銘心的小辣椒，三年前談婚論嫁的階段分手，提起嘅時候，無限惆悵。他說朋友都在擔心他，幸好我出現了，讓他忘懷。講起佢前妻，被佢發現手機親密照，話佢信教但一個又一個大話，情緒係……不屑?講起年輕時一個女友，鬧交時順手掟佢粒玉(佢媽嘅遺物)，可能事隔太耐，佢係覺得好笑嘅。講起年少時，有個女友懷孕了但bb唔係佢嘅。佢身上面兩個紋身，頸嗰個係掟玉女友，另一個又係邊位呢。

佢話過，佢唔會唔要我，會當我豬豬咁養肥我，會無時無刻攬實我，會永遠只掛住我一個。呢個係佢對我嘅承諾。

我相信，所以我決定離開另一半，同佢好好過落去。

我計劃搬出嚟，佢好堅持唔俾我一個人住，話唔放心，說服我同佢一齊住。

佢話之前已經搵緊屋，物色咗一間幾好嘅，空間大，價錢唔貴，仲有個露台可放佢嘅裝修工具。佢話就將嗰到租落嚟啦。但係上手租客未搬走曬d嘢，未可以即時入住。點解上手未搬走就可以睇樓咁神奇。

於是我決定離開另一半搬出嚟。

我地一齊揀傢俬。梳化佢讓我揀結實嘅，而且佢明明喜歡其他色，但我喜歡白色所以訂咗白色。牀褥佢怕我腰痛發作，任我揀超結實嘅，佢無異議。牀鋪我喜歡絲滑的，我地揀咗同花紋，一套深藍一套白。毛巾佢買咗超柔軟嘅bb毛巾俾我，佢自己用公司派嘅粗糙毛巾，佢話佢做維修/裝修成日攪到成身塵，用粗貨就好。牙刷用同一枝電動牙刷，一人一個刷頭。電視機同音響都任我揀，佢俾個小意見。兩房單位嘅細房仲俾我做衣帽間，訂造個超大衣櫃全鏡面，仲有個大鞋櫃啱曬我。佢攞住圖紙同我商量設計，揀飾面，編織將來，真甜蜜。

佢努力用佢畢生裝修功力訊速粉飾間屋，幾日不眠不休，但因入伙吉日未到，未住得入去。

唯有住酒店先。

佢話，佢將兩部手機密碼設定為我地紀念日，我可隨時睇佢手機。佢部後備手機乾脆留俾我，呢部手機影相靚d，我地平時約會影相喺曬呢部手機。

佢俾咗隻戒指我，套我無名指。我問佢嗰隻喺邊，佢又唔戴。

佢俾咗隻玉鐲我，係佢媽嘅遺物。

住酒店好唔慣，香港地地方窄，坐都坐唔好，好辛苦，房入面又無嘢打發時間，我就由朝到晚掛住佢，掛到佢放工返嚟。佢返工係輪更制，有時要返夜，生理時鐘大混亂。

好多時佢唔識醒，好彩有白撞電話適時打嚟，嘈醒佢。

好不容易捱完酒店到入伙日喇，不過傢俬未到，都未正常生活。

若無法觀看影片，請→點此←

咦，呢個地板……咪係影日本買返嚟嘅酒嘅背景?呢個地址……咪之前你開單俾我公司嘅地址??咦你電話嘅密碼，點解唔係我地嘅紀念日???

佢話，呢個單位係佢前女友租落嘅，公司亦用呢個地址登記。

佢話，密碼日期係小辣椒分手日。設為密碼，因為佢終於可以忘記呢個人。